Et nunc vaticinans irato haec funera Phoebo
Missa canis genti Danaūm, dimittere captam
Quod non sustinui Chryseïda. quippe Mycenis
Optabam nostros coleret captiva penates;
Illa Clytemnestra melior, quam corpore, mente
Quam celeri longe praestat, manuumque labore.
Nec tamen abnuero, si rerum pendet ab illa
Certa salus, Chrysam duci, reddique parenti:
Nec populi exitio laetor, dirisque meorum
Funeribus: contra sed vos mihi digna parate
Praemia confestim, donis ego solus Achivūm
Ne caream. nam quod mihi muneris obtigit, ecce 150
Dilapsum fluit e manibus longeque recedit.
Vix ea fatus erat, paribus cum dius Achilles
It contra dictis, et magno haec pectore fatur:
Inclute rex Atride, animo qui tantus habendi
Gliscit amor? praedae non ulla intacta Pelasgis
Pars superat. victis quae capta ex urbibus olim,
Partiti ad naves tulimus, sua quisque, laboris
Exiguum ingentis pretium; nec didita castris;
Cogi iterum, partemque tibi deducier aequum est:
Verum, age, poscenti Phoebo concede puellam: 160
At nos tergeminis aequi pensabimus olim
Jacturam donis, si quando Jupiter urbe
Annuat Iliaca tandem, gazaque potiri.
Tum sic Atrides: Nequidquam vana per artem
Moliris, Pelida, dolis et cuncta videntem
Fallere vis tectis. partis tu nempe fruare
Dives? ego famula doleam fraudatus adempta:
Audi ergo, et mea dicta memor sub pectore conde.
Vel mihi pro rapta dignum Chryseïde munus
Sponte dabunt Graji, dare vel si forte recusent 170

Vade retro

Vade porro