Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml]. Si vis in lexico quaerere, verbum elige et clavem 'd' in claviatura preme.
HOMERI ILIADOS LIBER NONUS
Sic laeti excubias pro moenibus urbis agebant Trojugenae: at Danais pectus fuga concitat imum, Terroris comes atra. ducum moerentia saevus Usque dolor penitus fodit alto vulnere corda. Horrendi ceu vasta cient cum caerula venti, Trux Boreas, Zephyrusque, ambo de finibus orti Threïciis; subito propulsu attollitur alte Unda tumens immane, fretumque exaestuat imis Sedibus, et multa litus perfunditur alga: Sic Danaūm vario, fervebant corda tumultu, 10 In partes distracta; omnes, turbataque luctu. It vultu moerens demisso ingentibus aeger: Atrides curis, et obit tentoria, et uni cuique, jubet, regum praecones dicere seorsus, In coetum veniant; clamori at parcere: primas Ipse sibi et sumit partes operae, atque laboris. Consedere omnes moesti: consurgit Atrides Ora madens lacrimis. Celsa ut de rupe cadit fons Dulcis aquae, ac pleno trepidat per confraga rivo: Sic fletu rigat ille genas. tum, pectore ab alto 20 Ingentem ducens gemitum, sic farier orsus:| o socii unanimes, Grajūm regesque ducesque, Jupiter, heu, me fraude mala Saturnius ipse Insontem implicuit; laetos qui ad tecta Laremque Promisit reditus, magno post eruta bello Pergama: nunc idem captum spe lusit inani,
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.