Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. Si vis in lexico quaerere, verbum elige et clavem 'd' in claviatura preme.
XXV.
Felis nimium festinus murem non capit. Feles duo. Solo jacebant invicem nexi duo Feles, et alter gestiebat alterum De more lingua blandienti allambere, Cum mus ab arcto se parum prudens cavo Proripuit: unus felium quammaximo Strepitu in fugacem prosilivit impiger; Antrum at celerior mus adiit. Alter, pede Qui sese agebat tacito, id adspectans catus Illam sodali crimini dabat fugam, Praepropero in illum quod ruisset impetu. Hic inquiebat, debuisse soricem Sic capere potius; ille qui senior negat, Jacuitque rursus, forte si erumpat foras Illic operiens, juniore in alteram Partem profecto fele: cito periculi Oblitus exit mus cavo rursum e suo. Catus suspenso paululum ut accessit gradu, In murem agiliter irruens illum rapit. Tum felis alter evocatus murmure Accurrit, atque soricem captum videns, In insequendis mox et ipse muribus Nimium ab praecipiti temperabat impetu. Plerisque nocuit immodica festinatio.
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.