HesiodusZamanja, Bernard (1735-1820) [1785]: Hesiodi Ascraei opera, versio electronica, 2747 versus, verborum 58425 [genus: poesis - versio; poesis - epica; poesis - elegia; poesis - carmen; prosa - epistula; prosa - commentarius] [numerus verborum] [zamagna-b-hesiod.xml].
Si vis in lexico quaerere, verbum elige et clavem 'd' in claviatura preme.
-- PA131 --
Demite vos vitam nobis; at reddite matrem,
Reddite Caesareis dulce decus laribus,
Reddite solamenque inopum, columenque senectae,
Iucundum cunctis reddite praesidium.,
Irrita sed fuerunt populorum vota, nec ullas
Audivere polo numina magna preces.
Occidit heu meritis et fama maxima regum,
Occidit a patriis edita Caesaribus
Austrias illa potens pietate et grandibus orsis,
Quidquid virtutum, quidquid honoris erat,
Vna in se capiens; qua nil spectabat Olympo,
Seu ferret Phoebus, sive referret equos,
Maius ad occasum roseo sublimis ab ortu
Per varia omnigenum dissita regna virum.
Flerunt Sequanicae sedes, et Tescheniae arces,
Flevit Parma dolens, moestaque Parthenope,
Et natas doluere suas, quas plaudere matri
Cernebant, contra ferre modo inferias,
Atratas, tremulisque ululatibus externatas,
Ac sparsas largis fletibus ora, vident.
Heu genus, heu benefacta! hanc tu mors invida terris,
Quae fuit aeternum vivere digna, rapis?
Nec puduit laesisse sacrum caput? heu quot in uno
Funere crudelis Persephone eripuit?
Eripuit certe multos, illa omnibus aequam
Quum matrem populis barbara surripuit.
HesiodusZamanja, Bernard (1735-1820) [1785]: Hesiodi Ascraei opera, versio electronica, 2747 versus, verborum 58425 [genus: poesis - versio; poesis - epica; poesis - elegia; poesis - carmen; prosa - epistula; prosa - commentarius] [numerus verborum] [zamagna-b-hesiod.xml].
|