Atridae iratus magno: ludebat inermis

Interea comitum manus omnis litore in ipso

Discoque, et jaculo certans, volucrique sagitta:

Alipedes at equi stabant vacuos prope currus

Abjuncti; et loton segnes, apiumque palustre

Pascebant: velis tecti de more jacebant

Myrmidonum currus intra tentoria; moesti

Illi hac, atque illac ibant per castra, ducemque

Optabant frustra, saevi et certamina belli.

Interea campis Danaūm condensa ruebant 320

Agmina, fulgentique ardentes aere catervae:

Ut segetem cremat ingenti cum flamma sonore,

Atque ruit late immissis Vulcanus habenis.

Terra gemit subter. Veluti cum, saeva corusca

Tela manu torquens, divūm rex fulgurat, alto

Et quatit in Arimis tonitru juga celsa, Typhoëo

Stravit ubi durum vasta sub rupe cubile;

Vadentum sic terra virūm concussa gemebat

Sub pedibus: celeri transmittunt agmine campos.

Iris at, aërias volucri pede lapsa per auras, 330

Ab Jove Trojugenis venit belli, atque laborum

Nuncia. Vestibulo in Priami juvenesque senesque

Stabant, turba ingens, in coetum forte coacti.

Intulit in medios huc se dea, voce Politen

Assimulans, gnatum Priami; speculator in alto

Qui, pedibus fretus, busto senis Aesyetae

Sederat, observans Graji si litore curvo

Digressi Trojae sub muros castra moverent.

Huic similis regem alloquitur, ac talibus infit.

o pater, usque placet longis sermonibus horas 340

Ducere, ceu quondam placida sub pace: nec ortum

Esse vides durumque, et ineluctabile bellum.