Crijevic, Ilija (1463-1520) [1484, Dubrovnik]: Carmina e cod. Vat. lat. 1678, versio electronica, 7675 versus, verborum 46525, ed. Darko Novakovic [genus: poesis - elegia; poesis - epigramma; poesis - lyrica; poesis - epica] [numerus verborum] [crijev-i-carm-1678.xml].
Si vis in lexico quaerere, verbum elige et clavem 'd' in claviatura preme.
-- 106v -- Fortunae uenientis honos. Iam copia dulcis
Eloquii, iam mella fluunt sermonis amoeni
Cecropiis potiora fauis septenaque pendent
Culmina in Orphei speciem stipata theatri,
Dicendique nouos miratur Roma lepores:
Scilicet Ausoniae laudantem numina laurus
Obstupuit, quem mox sacraria sancta tenentem
Et Vaticano uoluentem cardine mundum
Miratura diu. Caelestes nacta benignos
Et faciles diuos meruit Mauortia tellus
Sub sancta ditione regi, seu numina uoces
Audiuere meas: dum munera nostra laborat
Eloquio decorare suo, meliore corona
Dignus erat. Dum me redimis, reuerentia creuit
Frondibus atque suum laurus duplicauit honorem,
Laetior et nullo censeri iudice gaudet
Nostra corona magis. Rudibus primaeuus in annis
Me licet ornarit Romani floribus oris,
Natalem simul et magnae cunabula Romae,
Praecessit tamen ille senes annosque uolucri
Praeterit ingenio. Tantum potuere mereri
Illa rudimenta et tenerae primordia uitae,
Fortunaeque decus praeuenit gloria linguae!
Nec pia fata diu uotum commune morari
Crijevic, Ilija (1463-1520) [1484, Dubrovnik]: Carmina e cod. Vat. lat. 1678, versio electronica, 7675 versus, verborum 46525, ed. Darko Novakovic [genus: poesis - elegia; poesis - epigramma; poesis - lyrica; poesis - epica] [numerus verborum] [crijev-i-carm-1678.xml].
|
