Aeternos inter flores, fructusque perennes. 45
Pulchrae aulae in medio resplendent ordine longo,
Queis mage formosum nihil, et praestantius usquam,
Commoda, delicias, thesauros divite luxu
Cogiungi hîc cernes, magnumque excire stuporem.
Lamnâ obducta auri fulgent tabulata micanti, 50
Gemmis parietes, auro laquearia celsa,
Fundere et ipse iubar sol, luna, ac astra videntur,
Totus ibi miros foetus sic explicat orbis,
Aptis nemo queat dictis effingere ut illos.
Haec cuncta excubiae servabant tecta fideles,
Quae dum densa furens invadit turba rebellis,
Contra illae obsistunt, vi vimque repellere tentant.
Emicat ast hostis numeroso milite victor,
Nulli et saevitiae parcens pede conterit omnes,
Sanguineamque viam sternunt sibi corpora caesa. 60
Dira at Vezirus reiecerit agmina quamvis,
Haud tamen ille metu, non est curisque solutus,
Nedum sedatum, quin motum conspicit auctum.
Audit Caesareae disrumpi limina sedis.
Hinc urbi, imperio metuens, sibi tristia damna, 65
Suscipere aggreditur coeptum, quod sospitet omnes,
Et mora nulla inopis Dervis sub tegmine opertus
Corripit ille viam, Euxinas quae ducit ad oras,
Partem Asiae auxilio meditans in bella ciere.
It ferme nudus, contectus pelle ferinâ, 7
Dum lateri cochlear, pendetque cucurbita, virgam
Dextra regit, Begum manet altâ mente reposta,
Persica quae captiva olim, nunc optima coniux,
Eois cuius species celebratur in oris.
Illam visuri tot reges litore ab Indo, 75
Et prope qui Tanaim degunt liquere penates,

Vade retro

Vade porro