Cobarnic, Josip (1790-1852) [1835, Split; Zadar; Makarska]: Dioclias carmen polymetrum, versio electronica, Versus 2345, verborum 17608, ed. La Redazione del Bullettino di Archeologia e Storia Dalmata [genus: poesis - epica; poesis - carmen; prosa - vita; prosa - praefatio; prosa - adnotationes] [numerus verborum] [cobarnic-j-dioclias.xml].
Si vis in lexico quaerere, verbum elige et clavem 'd' in claviatura preme.
-- 53 --
Efficiunt, nimioque labore nitentius intus:
Insculptaeque simul coronae omnia cingunt
Romanosque modos gustumque ostendere certant.
Numinis effigies adstat nitido aere coruscans
Aedicula in media. Semoto exire recessu
Adspice serpentem longo volumine, ut alte
Extollit caput horrendum, linguamque trisulcam,
Exagitansque oculos reptans dat sibila crebra,
Conscenditque aram, statuam superare fatigat
Fulgentemque Dei faciem. Timor illico cogit
Tentantem ruere in praeceps, atque ore venenum
Lambere diffusum frustra. Tum pectore fervens
Et portentiferae reserans prodigia mentis
Grandia voce canit Petrus; fert grandia voltu.
Quae mihi rerum species recentum
Sistitur cultum removens nefandum?
Cuncta pollentis video corusca
Munera dextrae.
Scilicet foedum simulacrum et ara
Corruit turpi maculata casu ;
Moxque nigranti trepidans recessu
Effugit anguis.
Desilit summo rutilans ab axe
Fulgor, et manans tenues per auras
Illico templum radiante circum
Lumine replet.
Grande vas lecto lapide excavatum
Tollitur signum referens cupitum,
Sculpta Crux adstat tribuens beatae
Pignora vitae.
Cobarnic, Josip (1790-1852) [1835, Split; Zadar; Makarska]: Dioclias carmen polymetrum, versio electronica, Versus 2345, verborum 17608, ed. La Redazione del Bullettino di Archeologia e Storia Dalmata [genus: poesis - epica; poesis - carmen; prosa - vita; prosa - praefatio; prosa - adnotationes] [numerus verborum] [cobarnic-j-dioclias.xml].
|
