Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-19 --
Perforat, et curru moribundum evertit ab alto.
Desiluit curru Idaeus, fratremque jacentem,
Turbatosque oblitus equos, instantia vitat
Fata fuga: noctem fugienti offudit opacam, 30
Et circum densa juvenem caligine texit
Vulcanus, patri servans; viduatus utroque
Ne gnato, luctu senior tabescat amaro.
Tydides captos bijuges candore nivali
Dat sociis, vacuumque ad naves ducere currum.
At vero, ut geminam prolem videre Daretis,
Hunc fugere, hunc multo morientem in sanguine volvi,
Trojugenae cecidere animis; in pectora cunctis
Insinuat gelida trepidus formidine terror.
Interea Martem (nanque is Trojana juvabat 40
Arma, gravis genti Danaūm deus) obvia Pallas
Aggreditur dictis, et vafro haec pectore fatur:
Mars clades hominum, saeva Mars caede cruente,
Murorum eversor; sinimus quin cernere ferro
Troas congressos Danais, quos vincere malit
cunque pater; nosque hinc vetitis abscedimus armis
Actutum, dictoque Jovis paremus uterque,
Dum licet? irarum scis quantos pectore fluctus
Neglectus volvat genitor, caeloque minetur
Dejecturum omnes ut caeca in Tartara divos. 50
Sic ait; eque acie deceptum callida Martem
Seduxit; placidusque rigat qua prata Scamander,
Propter aquam viridi riparum in sede locavit.
Continuo versi Troes; cedentibus instant
Grajugenae. sibi quisque virum dux eligit omni
E numero, leto sternens. Agamemnonis hasta
Gentis Halizonum ductorem, ad moenia curru
Averso fugientem Hodium cervice sub ipsa
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
