Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-212 --
Puppibus, et muro campi complexa coërcet
Fossa ingens, totum Danai magis et magis usque
Complebant, currusque simul, clypeataque pubes
Densa virūm sese miscensque urgensque. favore
Summi laetus enim Jovis Hector, Marte cruento
Haud minor, angustum cunctos concluserat arctans
In spatium. Ille adeo rapto ferus igne carinas
Ureret, Atrides, monitu Junonis amicae,
Ni celer hortari pavidos coepisset Achivos.
Ille inter puppesque, alta et tentoria, dextra 260
Purpuream gestans chlamydem, volat ocyor aura;
Celsam Ithaci et scandit puppim, quae litore stabat
In medio, audiri longe ut vox posset utrinque,
Et qua parte Ajax, et qua tendebat Achilles;
Extremi, validis confisi viribus ambo,
Et virtute, suas qui subduxere carinas.
Huic instans clamore omnes ciet acer Achivos:
Pro pudor! o specie mirandi, o rebus inertes
Argivi! quo nunc illa ingens gloria, quo tot
Magnaque verba, minaeque acres abiere? ferebat 270
Quisque etenim se laude olim super astra; juvencis
Cum Lemno in sacra caesis, epulaeque vigebant
Scilicet, ac multo fervebant pocula Baccho.
Quisque parem bello centenis, atque ducenis
Nam fore se Teucris jactabat. solus at omnes
Nunc terretque, fugatque Hector: mox inferet ignes
Exuretque cavas, nullo prohibente, carinas.
Magne deūm rector, quem tanta clade potentum
Afflixti regum? cui tanta est gloria, tantum
Et decus ereptum? nusquam tamen ulla tuarum 280
Ara mihi, haec tristi cum fato ad bella venirem,
Praeterita est puppi, struerem quin pinguia large
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
