Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(1) Novam statutorum compilationem Februario mense ad transmissam tradius redire
Caesaream, veniam, spero, mihi dabit reverendissima amplitudo vestra, si
intellexerit me toto quadragesimae tempore domo absentem in comitiis procerum
provinciae Bolzani distentum fuisse ac primum dominica in albis ad mandram
Stambsensem regressum. (2) Remitto igitur vel nunc tandem -- F271v -- praedictam
statutorum epitomen adiuncta hac mea censura, quod sententia reverendissimorum
dominorum praesulum Bavariae libens subscribam, duabus tantum clausulis exceptis,
quarum una est de visitationibus annuis, quas circa monasterium meum eatenus
restringendas spero, ut sufficiat intra triennium bis illud visitari, altera, quod
in praetactis novis constitutionibus § 5 ad calcem insinuatur consuetudinis esse, ut
abbas de receptis et expensis priori et nonnullis senioribus prudentibus annuatim
rationem faciat. (3) Hoc enim uti in Stambs numquam auditum, numquam usitatum fuit,
ita nec deinceps fieri poterit, utpote quod dignitati et praeminentiae abbatiali
minus consentaneum videatur. (4) De reliquo reverendissimae et amplissimae
dominationi vestrae cum dulcissima salute me meosque semper commendatos cupio, ex
Stambs 19. Maii anno 1671.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|