(1) Resurgentis Christi festivum phase reverendissimam amplitudinem vestram cum suis in laetitia et exultatione transegisse credam, et ut hic gaudii fomes in sospite ac bene sano corpore reverendissimae dominationis vestrae quam diutissime perduret, animitus opto, donec in Ierusalem, quae sursum est, perpetuum cum beatis Alleluia decantet. (2) Triste nuntium de illustrissimi nostri archimandritae Claudii [ERROR: no reftable :] illustrissimi ... Claudii] Gemeint ist der verstorbene Generalabt Claude Vaussin. et consueta revocatione comitiorum generalium citius percepi, quam volupe erat, spero tamen futurum, ut clementia supremi Numinis post turbinem desolationis brevi rursus serenum nobis infundat communemque luctum ex tanto funere susceptum novi in Cistercio sideris exortu suaviter abstergat. (3) Equidem existimaveram nos laeto evangelio de prospera electione optati successoris iam propediem in paschate recreandos fore, quandoquidem, ut inaudivi, electioni praefixus fuit dies Martii decimus nonus, festivus sancto Iosepho, a quo iam mensis diffluxit.