(1) Annum novum placabilem et omni benedictionum copia affluentem reverendissimae et amplissimae dominationi vestrae animitus apprecor, et ut huiusmodi Ianuarias revolutiones adhuc quam plurimas sospes vivat ac felix decurrat, opto ac voveo. (2) In tesseram huiusce affectus mei mitto de proxima mea vindemia, quam Deus liberalissimus solito uberius benedixit, doliolis duobus lacrimas et sanguinem nostratis uvae, crastino die in Fiessen ad officialem meum Ioannem Spaiser perventura, quae reverendissima amplitudo vestra velut exiguam strenam bene consulat velim. (3) Intellexi quidem non multo abhinc tempore ex praedicto officiale meo Fiessense huiusmodi vini doliola deinceps absque teloneo Caesaream usque vix penetratura, sed nihil ambigo reverendissimam amplitudinem vestram in mediis providendis non defuturam, ut illa secure penum Caesareensem subintrent.