(1) Magnopere mihi probatur[ERROR: no reftable :] probatur] Vgl. Primisser cap. 43 § 20 Confoederatio curae piae cum Novacellensibus canonicis regularibus restaurata. sancta et salubris sollicitudo, qua reverendissima at amplissima dominatio vestra erga pios defunctorum manes tenetur suffragiis viventium iuvandos. (2) Et quia inter vestrum Neo-Cellense ac nostrum Stambsense coenobia iam ab antiquo confraternitatis foedus coaluit, de ferendis mutuo pro animabus utrimque decedentium orationibus aliorumque piorum operum suppetiis merito est, cur reverendissima et amplissima dominatio vestra hoc tam sanctum institutum plurium iam annorum curriculis quasi collapsum,

aut saltem incuria vel oblivione intercedente sufflaminatum denuo resuscitare desideret, quam quidem foederis renovationem omnino ratam habemus et approbamus. (3) Ceterum ut colendissimis dominis confoederatis innotescat, quas nos defunctis ipsorum collegiis spiritualium suffragiorum sportulas feramus, imprimis praeter participationem omnium bonorum operum, cum nobis mors alicuius denuntiatur, singuli sacerdotes collectam pro eodem in missa sumunt, fratres vero clerici vesperas defunctorum simul dicunt, conversi seu fratres laici quinquies orationem dominicam cum totidem salutationibus angelicis persolvunt. (4) Deinde quottidie post primam in capitulo releguntur necrologio inserti pro praesenti die et ante exitum capituli pro iisdem ordinariae preces exsolvuntur. (5) Tertio (quod praecipuum inter functiones nostras est) quilibet sacerdotum nostrorum omni mense sacrum de anniversario dicere tenetur pro defunctis illis, quorum nomine necrologio nostro, ad quemvis mensem intitulata et adscripta sunt, ita ut quantuscumque sit numerus presbyterum, singuli quotannis 12 missae sacrificia pro memoratis mortuis Deo immolare cogantur. (6) Plura pro confoederatis superaddere nos non sinit numerositas fundationum, quibus monasterium nostrum praegravatur. (7) Atque haec pauca in vicem desideratae responsionis. (8) Supremum Numen reverendissimam et amplissimam dominationem vestram cum toto suorum venerando collegio longaeva donet prosperitate, ex Stambs 19. Ianuarii anno 1669.