Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(1) Diu desiderata, exspectata diu nuperi capituli generalis acta ex Romanis latebris
tandem lucem Germaniae nostrae aspicere plurimum gaudeo, quorum apographum a
reverendissima amplitudine vestra mihi transmissum veluti ovum paschale accepi ipsis
resurgentis Christi instantibus feriis. (2) Perlegi illud attente et studiose, sed
praeterquam quod in eo plures articulos obscuritatibus implicitos deprehenderim, ex
iis, quos Germania nostra mutatos aut ad moderationis orbitam reductos cupiebat,
nullum vel levi calamo perstrictum offendi. (3) Quae dissimulatio amplam certe nobis
materiam praebet et causam congrediendi atque in comitiis nationalibus efficacius
rebus nostris prospiciendi, quod reverendissimae amplitudinis vestrae solerti
industria sine longa procrastinatione effectui dandum spero.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|