Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(3) Ceterum quia non multo abhinc tempore fida relatione comperi a praedicto
illustrissimo domino episcopo legatum quendam (reverendum patrem Ioannem Casparum
Poda) sub finem anni proxime evoluti Romam directum, qui inter cetera negotia etiam
monasterii mei Stambsensis iura in disceptationem trahere et convellere iussus sit,
etiam atque etiam rogo amplissimam dominationem vestram, velit eiusdem legati
machinationes secreto indagare et, ubi adversum quid rescierit, quod ille me inscio
et inaudito per falsa narrata subreptitie expracticarit pro honore ordinis murum
sese opponere dignetur, habitura me semper promptissimum ad refundendum, quidquid
impensarum desuper opus fuerit. (4) Porro ut huic clanculario agenti Brixinensium
iniqua forsitan contra me molituro amplissima dominatio vestra obviare possit, spero
eandem adhuc penes se habituram compendiosum illud summarium, quod iura et
privilegia monasterii mei brevissime complectens supradicto anno 1664 amplissimae
dominationi vestrae Romam transmisi. (5) Propitium Numen eandem diu ordini nostro
servet incolumem! (6) Dabam ex Stambs vigesimo nono Ianuarii anno millesimo
sexcentesimo sexagesimo septimo.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|