(1) Quas reverentia vestra die commemorationis omnium animarum ad me dederat, quinto post die accepi illa eadem hora, qua ex nundinis Halensibus redux domum perveni. (2) Nec cunctatus statim in proximo capitulo defunctum confratrem nostrum Burkardum more ordinis absolvi et consueta precum ac sacrificiorum pro ipso suffragia institui. (3) Secutus est dictum patrem in regionem aeternitatis seniculus piscator noster Bernardus Wolf nono huius mensis extinctus, cum vix biduum decubuisset. (4) Is per exomologesin quidem expiatus et sacro munitus viatico fuerat, non tamen extrema unctione armatus; (5) nam dum illam mane post sumptam eucharistiam accipere longiorem sibi vitam pollicitus renuisset, vespere percipere amplius non potuit accelerante morte praeventus et abhinc evocatus, dum sacerdos uncturus esset in via. (6) Utrisque misericors Deus requiem tribuat sempiternam!