(1) Ultima Aprilis accepi, quas ad me reverentia vestra ex suo Wertacensi diversorio secunda paschatis feria exaraverat. (2) Alteras vero reverendissimo nostro,[ERROR: no reftable :] reverendissimo nostro] Gemeint ist Abt Bernhard Gemelich. cui erant inscriptae, nondum ad manus consignavi, quippe qui iam inde a sabbatho sexagesimae, quo a nobis digressus Oenipontum petiit, numquam adhuc vel ad horam monasterio pedem intulit. (3) Tenui quadra victitare reverentiam vestram hoc tempore, seu esca, seu potus spectetur, pronius credo, quam ut multis mihi persuaderi necesse sit; cumque vinum, quod Wertacenses propinant, tam ignobile sit et quasi nullarum virium, miror illud insuper reverentiae vestrae parce administrari fateorque libens heminam seu mensuram dimidiam, quam pro ordinaria diaeta mensae vestrae inferri audio, nec complexioni corporis nec laboribus, quos exhaurire oportet, ullatenus respondere. (4) Ut ergo doliolum de vino nostrate, quod reverentia vestra sollicitat, a reverendissimo nostro in solatium curarum et sudorum proxime submittatur, ego suffragii mei partes libentissime interponam idque cum vivae vocis ministerio absens ad absentem non possim, hisce diebus scripto me spondeo praestiturum. (5) Unum male me habet, quod ocreis carere nunc debeam, de aliis non provisus, quas inducere possem. (6) Existimaveram equidem, cum viae comes ac stipator Thomas Mark equum reduceret, certo etiam ocreas relaturum, sed spe mea elusa vacuus se stitit exspectanti viator. (7) Plura pro nunc addere prohibet magna capitis debilitas, qua premor. Valeat reverentia vestra et invictum in vinea Domini spiritum non relaxet!