Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(1) Alteras iam litteras reverentia vestra ad me direxit, sed prioribus a me
responsum non est, quod eo ipso die allatae essent, quo phlebotomia ob corporis
indispositionem uti debueram. (2) Grates habeo reverentiae vestrae tam pro oblato
nuper caseo, quam pro frugibus modo recens transmissis; quamquam nam ego casei
amicus non sum, tamen non desunt, qui eundem prope inter cupedias habeant. (3)
Quaeso, reverentia vestra excuset me apud patrem Ioannem, quod ad binas ipsius
epistulas necdum responsi aliquid rescribam, praestitissem id profecto libentissime,
sed aliis negotiolis praepeditus temporis angustia laboravi; proxima tamen
occasione, ne me sui immemorem existimet, et litteras ad ipsum dirigam et, quod ille
magis habet in votis, descriptos Conscientiae Casus certo certius transmittam. (4)
Interim reverentia vestra ipsi et cumprimis domino parocho amicam meo nomine salutem
impertiat, quibus omnibus vindemiam pinguem et uberem exopto.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|