(2) Heri sub medium quintae vespertinae appulit in monasterio nostro dominus Iosephus a Wolfsthurn, qui reverendissimae pietati vestrae se officiosissime cupit commendatum. (3) Eodem hesterno vesperi advenit tandem aliquando ad visendum sanctum Ioannem nostrum in montibus e tribu lanionum Monacensium non confrater aliquis, sed una soror, lanionis cuiusdam non de infimo censu coniux, quae et hodiernum totum diem devotioni suae hic impendit et crastinam etiam sanctissimae triadis solemnitatem exspectat divinis ad sanctum Ioannem interfutura et relectionem confratrum e suggestu auscultatura. (4) Cui quod humanitatis ac beneficientiae exhibere licuit, non praetermisimus.