(3) Submitto autem ex condicto etiam nostro de gremio duos, patrem Martinum Steger et Edmundum Quarantam, circa quos easdem servari opto conditiones, quas reverendissima et amplissima dominatio vestra patribus suis inculcatas voluit, ne videlicet in pagis aut aliis locis extra monasterium divagari sinantur, et ut octo vel decem dierum recreatione contenti, evoluto tali termino remeare ad propria non fastidiant. (4) Quod superest, reverendissimae et amplissimae dominationi vestrae precor quam fortunatissimum regimen, atque ut desideratam suae dignitatis confirmationem Roma feliciter ac efficaciter brevi tandem obtineat, animitus voveo.