(1) Iam dum ante ferias Christi nascentis, ut nosti, aditum tibi ad sacros ordines aperire intenderam, at obsistente rigore consistorii Salisburgensis mea ego intentione et tuo tu desiderio frustrati sumus. (2) Sed en, alteram tibi nunc pando ianuam publicas dimissorias patentis formae transmittens, quas a reverendissimis et magnificis dominis consistorialibus repudiandas non credam, modo ne tu succubueris in arena examinis. (3) Successum rei proxime ad me perscribes, forsitan accepturus sub autumnum licentiam alteram, qua in sortem etiam diaconorum coopteris.