(1) Quas sub Ianuarii primordia ad me dedisti, a pluviis madidas undecimo huius rite accepi; quod vero ante illas per bimestre et ultra nullum epistularem nuntium in Stambs direxeris, superiorum tuorum imperio conformiter non egisti. (2) Nec te extricas, cum spinis logicis ais fuisse intricatum, nam primas semper oboedientiae deferas oportet ac posteriores litteraturae. (3) Theses prolegomenales, quas misisti, a te disputatae fuerint, an ab alio, ex litteris tuis colligere mihi non licuit. (4) Illae vero qualemcumque philosophiam sapiant, tu fontem optimum puta, quem bibis!