Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(3) Biduo a recessu reverendissimae pietatis vestrae appulit directa ex Fiessen
vectura gypsi, quae quot modiorum sit continens et quid in eius vicem repensum,
adiunctae reciprocarum copiae reverendissimae pietati vestrae denuntiant. (4)
Difficultas equidem inter nos et haesitatio permagna fuit, num aliquid vini in
praelium et refusionem lapidis conducti et advecti erogandum foret, quando
officialium nullus super hoc negotio quidquam mandati accepisse testabatur. (5)
Attamen attentis variis circumstantiis iudicatum est inhumanum et ab omni humanitate
prorsus fore alienum, si currum cum quinque equis et uno auriga ac duobus
stipatoribus viam tam longam ac difficilem vacuos omnino remetiri sineremus. (6)
Quocirca in illud opinionis convenimus, quod aliquae saltem vini urnae pro nunc
ablegandae essent, -- F61v -- (ne domino abbati Fiessensi indignationem et stomachum
moveremus) quidquid vectores in contrarium suis precibus obnitebantur integras 14
urnas se sublaturos arbitrati. (7) Quid porro in hac causa et contractu deinceps
actitandum sit, directionem et mandatum intenti exspectamus reverendissimam pietatem
vestram et nos una providentiae divinae impensissime commendantes.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|