Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
(7) Abbas Regiifontis exul Wettingam in festo sancti Benedicti appulsus sua, ignota
licet, salute reverendissimam pietatem vestram honorat seque peramice commendat. (8)
In simili per litteras saepedicti patris secretarii mihi directas obsequiosum et
amicum salve dicit reverendissimae pietati vestrae dominus Maristellanus, hoc
temporis pedes non bene affectus, qui tandem theologiae professore (ordinis sancti
Dominici religioso) iam rite provisus est; cui praeter decentem amictum et mensam
abbatis atque annuum salarium 200 imperialium, tantum respectum et honorem audio
exhiberi, adeo ut servitia patrum officialium, quin et ipsius abbatis mens atque
oculi super mensam, tantum aut saltem praecipue in lectorem conversi sint et
intenti, ea maxime cura observata, ut fiat, quod huic theologo professori sit
gratum, et caveatur, quod displicitum. (9) Atque haec rogatu patris Staub obiter
erant intimanda.
Stephani, Benedikt; 1613–1672 (1613–1672) [1640], Copiae Litterarum ad diversos ab anno Christi 1640, versio electronica (), 272 folia, Ed. Schaffenrath, Florian [word count] [stephani-b-copiae].
|