(3) Ex subditis territorii nostri elapsis octo diebus personas duas mors rapuit, vix tridui morbo decumbentes. (4) Altera erat Anna Perkhoferin, quae a multis annis ad portam nostri monasterii panes similagineos et varii generis obsonia vaenum exposuerat. (5) Haec aestu vehementi (qualis in febre Ungarica) subito correpta tertium, non amplius, diem supervixit, in eo prudens et provida, quod mature domui suae disposuerit ac mysteriis, quae ecclesia moribundis decrevit, omnibus se fecerit praemuniri.