14. in detractores pro magnifico Petro Triuisano, Spalatensium rectore
Mens mala, corrupti mores, ignobile uulgus
Et cum periura lingua canina fide:
Hei duo pacificam turbantia carmina mentem,
Nescio quod dedecus conuiciumque nefas,
Ausa fuere modo genuinos frangere dentes
Nomen et illius uelle notare uiri,
Qui tulit huic miserae tantum solaminis urbi,
Aegroto quantum ferre medella potest;
Qui populos ratione feros grauitate coercet,
Conspicua cunctos qui pietate fouet;
Quo melius quicquam uoto exoptarier ullo
Haud potuit, probius iustitiaque prius.
Nil nocuit sed enim foedae petulantia linguae,
Iccirco mala mens uicta dolore iacet.
Victa iace, mala mens: mala dis tribuantur iniquis
Cuilibet, exemplo corruat ipse suo.

-- 17r --

Non potis est claram uirtutis rumpere famam
Improbo: stat titulis non uitiata suis.