Marulic, Marko (1450-1524) [1496, Split]: De institutione bene vivendi per exempla sanctorum, versio electronica, Verborum 186963, ed. Branimir Glavicic [genus: prosa oratio - tractatus] [numerus verborum] [marul-mar-inst.xml].
Si vis in lexico quaerere, verbum elige et clavem 'd' in claviatura preme.
Narrat idem Cassianus monachum etiam quendam Mesopotamenum, qui annos multos
clausus uixerat, continentię cęterarumque uirtutum fama supra omnes
insignis, eodem fraudis genere, hoc est, sub angeli forma a diabolo
deceptum, ita ut ad Iudaismum declinarit et circumcisionem acceperit. Etenim
multis illius non falsis reuelationibus et coram se coruscantis luce
delinitus, firmissime credidit ipsum esse cęli, non tenebrarum spiritum. Vbi
hoc persuasum est, illo tandem monstrante uidere sibi uidebatur apostolos
martyresque et omnem prorsus Christianum coetum tristes abiectosque in locis
miserię ac perditionis esse, at e contrario Iudaicum populum cum patriarchis
ac prophetis ingenti lumine fulgere et alte sydereis in sedibus lętos ac
gestientes uersari. His itaque diabolicę malignitatis pręstigiis illectus
corruit in errorem, nihil ab eo falsum ostendi posse ratus, a quo toties,
quę uera erant, didicisset, ignarus hanc esse pescatorum maliciam, ut hamum
escis tegant, non pascendi, sed prehendendi perdendique causa. Aut quid
aliud diaboli blandimenta nisi odiorum insidię sunt?
Marulic, Marko (1450-1524) [1496, Split]: De institutione bene vivendi per exempla sanctorum, versio electronica, Verborum 186963, ed. Branimir Glavicic [genus: prosa oratio - tractatus] [numerus verborum] [marul-mar-inst.xml].
|