Marulic, Marko (1450-1524) [1496, Split]: De institutione bene vivendi per exempla sanctorum, versio electronica, Verborum 186963, ed. Branimir Glavicic [genus: prosa oratio - tractatus] [numerus verborum] [marul-mar-inst.xml].
Si vis in lexico quaerere, verbum elige et clavem 'd' in claviatura preme.
Quantum porro expediat mortalibus, cum supersunt illis boni doctique
prędicatores, quantumue obest, cum desunt, Niniue seruata, Sodoma et Gomorra
euersę docent. Illa Iona prophetante poenitentiam egit, hę absque doctore in
omne scelus pręcipites iere Deoque ulciscente ad internitionem redactę sunt
implentes illud Salomonis oraculum: Cum propheta defecerit, dissipabitur
populus. Et ut ad nostra ueniam, Petro prędicante cecidit Spiritus
Sanctus super omnes, qui audiebant uerbum. Paulo autem absente et inter
Corinthios, quos ad Christum conuerterat, schisma oritur et Galatę, a
pseudoprophetis tentantur. Huc accedit, quod, qui prędicatores acceperint,
Christum accepisse, et qui eiecerint, eiecisse probantur. Et quid hac re
peius, quid illa melius?
Marulic, Marko (1450-1524) [1496, Split]: De institutione bene vivendi per exempla sanctorum, versio electronica, Verborum 186963, ed. Branimir Glavicic [genus: prosa oratio - tractatus] [numerus verborum] [marul-mar-inst.xml].
|