Quod si ita est, locus ergo a necessitate praecipue ad mitigandum laborem erit accommodatus; ut ostendas quam stultum sit iniquius ferre eas res quas aliter tenere non uales. Ideo Seneca ait: Stultum est timere quod uitare non possis, et Hieronymus ad Tyrasium: Non tam grauiter eos casus feramus quos nullo modo euitare possimus. [ERROR: no reftable 1:]

Ex hac ratione apud Vergilium uxor Aeneam increpat frustra lacrimantem:

Quid tantum iuuat insano indulgere amori,

o dulcis coniunx?[ERROR: no reftable 1:]

Ex hoc genere et illud Terentianum est:

quando non potest fieri id quod uis,

id uelis quod possis.[ERROR: no reftable 1:]

Hinc est et quod uulgo lamentanti flentique dicimus: "Quid tandem facies? Iam actum est; restitui res nequit. Pone inanes lacrimas", aut "Siquid lacrimis recuperari restaurariue potest, multi praesto erunt qui te maxima earum copia iuuabunt". Hac ratione comicus Graecus usus est cum inquit:

Si malorum medicamentum lacrimae essent semperque flens a labore quiesceret, aurum pro lacrimis penderemus; nunc uero molestiae has nec respiciunt nec intendunt, here, sed siue fleas siue non, eandem tamen ingrediuntur uiam.[ERROR: no reftable 1:]

Ista atque alia eiusmodi apud prudentes animos multum angorem sedare consueuerunt.