624. [623.] In idem argumentum.
Quae loqueris, Pupi, malo nescire, labore
Quam nimio intentis auribus excipere.
Apta loqui, perhibent, nec sperni digna; necesse est,
Credam aliis verum id, qui nihil audierim,
Cujus, crebra tibi video dum labra moveri,
Verborum haud quidquam venit ad auriculas.
Nec tam longe absum, paucis disjungimur ulnis,
Sed tua vix paucos vox meat ad digitos,
Interdumque ipsis, nondum propulsa per auras,
In labris haerens languidula emoritur.