266. De Italico epigrammate, quo laudatur puella Juliae partes agens.
Quam laudat Petrus, si digna est laude puella,
Laudarine illo se ferat ipsa modo?
Gaudeat illa sibi dici hoc? "Jura omnia prae te
Sprevissem indomito caecus amore tui:
Non me Vesta parens, non Juppiter ipse teneret,
Sacris te victor ne raperem ex adytis."
Id brevius potuit dici, nec apertius: in te
Uror, io, foedis, pulchra, cupidinibus:
In media possit quod vix audire Suburra,
Si qua sibi mulier corpore quaerit opes.