344. [342.] [  101] Ad Clementem XIII. recuperandae salutis causa rusticantem.
Dum te rura tenent, contractae seria frontis,
Regnorum et curas, magnaque consilia,
O pater et Thracum turbas et si qua timentur,
Cuncta sub Albano tristia merge lacu.
Quidquid ages, quoquo flectes vestigia, circum
Te spes, te circum Gaudia laeta volent,
Ingenui et Lusus et suavis turba Leporum,
Et Jocus et vultu Risus hians hilari.
Queis sine nil gelidi fontes, nil florea rura,
Umbraeque et lenes profuerint Zephyri,
Nec tibi decedet fesso de corpore languor,
Nec bene erit nobis, queis pote nil melius,
Nil quidquam in vita jucundius esse, valentem,
Imperii quam te froena tenere diu.