31. [30.] Ad Romanam Arcadiam, cum Auronti, id est Clementi XIII.tio ob datam pecuniam ad Parrhasii nemoris instaurationem gratiae agerentur.
O nemus Arcadiae, pastorumque aurea sedes,
Foeda modo et densis vepribus horridula,
Nunc pulchra, atque nitens et coetus digna Quiritum,
Moenalios vatum digna videre choros,
Salve; Aurons non immerito quam curat, amatque,
Salve, omni Aurontem quae redamas studio,
Illius et niveo servas in marmore nomen
Illius et multa laude sonas; iterum
Atque iterum mi salve, Aurons quam diligit, omni
Aurontem contra quae pietate colis.
Haec tibi me miro res utraque jungit amore,
Haec facit agrestes nescio quos calamos,
Atque lyrae, atque tubae, silvestrem et Pana Camoenis
Omnibus et Phoebo laurigero anteferam.