Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. Si vis in lexico quaerere, verbum elige et clavem 'd' in claviatura preme.
IX.
Cum ad nuptias vocant Asinum, vel aqua, vel ligna desiderantur. Asinus invitatus ad nuptias. Miserandae Asellus sortis in vernantibus Pascebat agris, cum puer anhelo volans Cursu, domi, inquit, cras adornat nuptias Herus, ad easque te vocari praecipit. Sibi haec Asellus serio dici ratus Se cogitabat vocis ob praestantiam Juberi adesse, redderentur ut suis Solemniores cantilenis nuptiae. Haec ille secum: verum herus qui dispare Cura tenetur, quique Aselli in pluribus Opera indigebat, jussit in lucum ocyus Ambos abire, ligna ut hic succideret, Dorso ille ferret. Servus it, et sarcinis Primis Rudentem, mox secundis praegravat, Dehinc rursus aliis noctis ad crepusculum. Perfracta nimiis membra jam laboribus Cadunt Asello, luce sed dum crastina Sibi fore melius cogitat, prae gaudio Exultat: at cum postero nullas die Domi intellexit apparari nuptias; Quin in vehendis per diem solidum sibi Aquis labores exanthlari maximos, Talesne, dixit, omnium miserrimo Mihi advenerunt nuptiae? Sicne has meus, Cum fonte, lignisque indiget, celebrat herus? Viro a potente cum quis inferior gradu, Qua non solebat, colitur observantia, Hic exigi operam sentiet ab illo suam.
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.