Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. Si vis in lexico quaerere, verbum elige et clavem 'd' in claviatura preme.
XXVIII.
Impone sarcinam, et tunde. Rusticus Asini magister. Ingressus urbem splendidam festo die, Plenamque populo monticola quidam rudis Non ante visis fixus in spectaculis Haerebat ore (gens ut agrestum solet) Hiante spectans: fistulae ad sonitum pigro Heic vidit Ursum saltitare corpore, Canemque ritu exercitati militis Tractare pedibus arma, gladium stringere, Rotare circum, quin et ictus ignea Balista in auras sat peritum explodere. Adspexit etiam sic nativis gestibus Hominum actiones aemulantem Simium, Ut mentem attonitam magnus tenuerit stupor. Contentus hos se belluarum argutulos Vidisse ludos, quotque ab istis artibus Quaestus proveniant sentiens, ut rusticam Domum repetiit, erudire Auritulum Et ipse studet, ut tibias inflet leves. Tardum sed animal, omni et ingenio carens Illius artis nec priores discere Evaluit apices: evasurum spes erat Asinum ad choreas aptiorem: tradere Huic artis ergo prima saltatoriae Elementa coepit; sed labore inutili Suscepta pariter haec opera: inepto latus Ergo discipulo duriori sarcina Gravavit, utque celeriter tereret viam, Vi summa adplicuit querceam ad nates sudem. Non cuncti ad eadem sunt agenda idonei.
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.