Croatiae auctores Latini: inventa |
domum | quaere alia! | qui sumus? | index auctorum | schola et auxilia | scribe nobis, si corrigenda inveneris! |
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. Si vis in lexico quaerere, verbum elige et clavem 'd' in claviatura preme.
Pauper maleficus resipiscens. Ut aequiore, manat unde verior Doctrina, adagio modo dicta corrigam, Narrationem, quam subnecto, perlege. Ira incitatus diviti cum inops viro Nulla absque causa lapidem impegisset, licet Hic par potuerat impudenti reddere, In jusve rapere puniendum carcere, Nil horum: miti sed columba mitior Insano illi offam quam ferebat obtulit. Obstupuit ipse tum scelestus hac viri Benignitate victus, et ad ejus pedes Statim advolutus criminis veniam sui Orare coepit, consecutus illico. Hoc ille pacto rediens ad frugem bonam Mutavit animum, divitemque numinis Colebat instar, pro viro haud timidus mori. Narrasti: at isti tun' ferendae injuriae Par esse possis? Ratio fac praesit, feram. Numeremus agedum, qui sprevere fortiter Quodcumque gravius evenibat. Socrates Percussus alapa, constanti id animo tulit; Cato salivam Lentuli, Pisistratus Idem a Trasippo; conjugisque Pittacus Iram superbae pertulit in convivio. Consulto omitto plurimos; uno tamen Adhuc morari libet in exemplo mihi. (*) Luxum severis dum coercet legibus, Ira frementes in Lycurgum divites Injuriosis adpetebant vocibus, Ictusque verbis addidere: se foro Proripuit ille, jamque cursu ad Palladis Tendebat aedem, cum ferocis ingeni Alcander alios antevertens insequi Totis fugacem viribus, jamque imminens Tergo, sude oculum, dum respexit, effodit. Casu Lycurgus nil commotus aspero Pedem retinuit, et cruentam civibus Faciemque, et oculum commonstravit erutum. Haec adeo ad iram, moeroremque pectora Inflexit species, puniendum ut dederent Lycurgi arbitrio: legifer sententiam Laudat, procacemque juvenem ut abduxit domum Nec re, nec verbo laesit, at domesticis Servis remotis, contubernalem sibi Alcandrum adhibuit; cumque non illum mala, Sed tantum agresti Ad se ut rediret, spes erat: nec irrita Cessit; Lycurgi quippe dum considerat Vitam ille propius, totque praeclarissima Virtutum exempla, sic profecit, ut brevi E contumaci juvene mansuetissimus Vir extitisset, et Lycurgi favitor.
Feric Gvozdenica, Duro (1739–1820) [1794]: Fabulae, versio electronica, 2266 versus, verborum 52873, ed. Sanja Peric Gavrancic [genus: poesis - fabula] [numerus verborum] [feric-d-fab.xml]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Za uporabe koje prelaze okvire ove licence obratite se voditelju projekta.