O Caesar, absit, facinus ut tantum patres!
Paulum efferatae mentis ignem mitiga!
Videbis huius turpitudinem mali.
Diceris unus coniugis tortor tuae,
Unus fereris gentibus passim tuis
Humanitatis Caesar immemor piae,
Grave quod inuret nomini probrum tuo.
Miserere, quaeso, vel mori una nos sine!
Max: Moriare simul an non, perinde censeo:
Christi modo cultrix furia nostra occidat!
Mel: Exue cruentum, Caesar, animum, deprecor,
Mitius in unam faeminam vir saevias!
Nec illud altum stirpis augustae genus
Tractes furore turbido dementius!
Sin te nec istud dedecus facti movet,
Nec amor iugalis, nec thorus, data nec fides,
Profusus iste lacrymarum nec liquor,
Quas ante vultus fundimus frustra tuos:

Saltem morare capitis hanc sententiam,
Donec repressum cordis irati iecur
Turba quietum iudicet syncerius!
Vix cessit usquam, quod subitus urget furor.
Max: Unde hae repente sunt mihi sophistriae?
Perage, satelles, imperata strenue!
Tollamus omnes dogmatis stirpes novi,
Ne quid veneni rursus usquam pullulet!
Nemo cadaver, praecipio, truncum levet:
Maneat petendum canibus et soli feris!
Liv: En, sum parata sub tyranno te mori.
Repudio foedus, sponsa quod nuper dedi.
Christus mihi vir est potens deus omnium. 1555sq.] B 1688sq.; C 1763. 1557–623] H 1396–421, 1425f., 1422–24, 1427–65. 1557–64] B 1673–79; C 1742sq. 1563] Cic. Sull. 88 ne qua generi ac nomini suo nota nefariae turpitudinis inuratur. 1568–70] B 1681–83. 1575–77] B 1684–86; C 1744sq. 1580–84] B 1691–93, 1696sq.; C 1746sq., 1757sq. 1580 Perage ... imperata] Octavia 438; 874. 1585] C 1752.