Caeterum Philippenses, ad quos divus Paulus apostolus scribit, hujus civitatis erant incolae. In cujus campis pugnavit primum Julius Caesar cum Pompejo. Deinde Augustus et Brutus cum Cassio; tantaque tumulorum per totos latissime campos erectorum copia cernitur, in quamcumque partem oculos verteris, ut numero eos comprehendere non facile possis. Nec dubium est vel praesentium indigenarum testimonio ducum ac virorum insignium fuisse sepulturas. Qui mos unde originem hunc in modum sepeliendi homines summos acceperit, nunc non succurrit mihi. Revera tamen sepulturas esse, licet etiam ex Vergilio cognoscere. Ait enim in III. de funere Polydori:
"Ergo instauramus Polydoro funus et ingens
Aggeritur tumulo tellus." Et in VII. de Cajeta nutrice Aeneae:
"At pius exequiis Aeneas rite solutis
Aggere composito tumuli, postque alta quierunt
Aequora." Est et in VI. simile, quod huc facit, de Palinuro:
"Quod te per coeli iucundum lumen et auras,
Per genitorem oro, per spem surgentis Juli:
Eripe me his, invicte, malis, aut tu mihi terram
Injice"