Pax: Sat prata, sat horti riserunt!

Felicitas: Explicate nunc frontem, sidera: sol, come nobiliore caput radio, et pleno arride globo, Cynthia!

Pax, Felicitas: Lux gemina, lux Serenissima diem ferat!

Emblema primum: Phoebus et Phoebe – D e u s c o n i u n x i t

Pax, Felicitas: Ite, ite auspicata, felicia Coelo sidera! Crescite via lactea, et terris sero occumbite!

Emblema secundum: Duo anuli conserti – U n i o g e m m a e s t

Pax, Felicitas: O anulos, o vincula, digna oculis, digna Principum manibus! O catenam auream, quae integra omnium sibi devinciet animos!

Emblema tertium: Duae manus consertae – I n c a r n e u n a

Pax, Felicitas: O casta foedera, quae sanguis sancit! Germano candore conveniunt, qui sic conveniunt in manus. Nodum Gordium sero, ah sero scindant Parcae!

Emblema quartum: Duo toedae decussatim colligatae – S i n e f u m o

Pax, Felicitas: Ardeant toedae, luceant toedae,

diviniore flamma coelitus accensae! O quot hinc lumina Christiano nascentur orbi Serenissima!

Emblema quintum: Duo gemini – A n i m a u n a

Pax, Felicitas: Vivite gemini, vivite sponsi, vivite unanimes! Discat a vestris amoribus concordiam haec aetas: mores ijdem, sensus ijdem, anima una!

Emblema sextum: Duae Columbae – C h r i s t u s E c c l e s i a m

Pax, Felicitas: Foecundae sunt et castae sunt:

Austriacum imperium discite ex hoc felici auspicio, subiecti! Sunt sine felle volucres!

Emblema septimum: Duo corda supra aram coniuncta, in quae flammulae depluunt – A d h a e r e b i t

Pax, Felicitas: Abeste, profani ignes, amica Coelo pluvia iam occupavit! Aurea redeunt saecula! Gemina corda, concordia pari liquescunt in unum!

Emblema octavum: Aquilini Pulli circa solem – N o n d e g e n e r e s

Pax, Felicitas: Ite, felices posteri, maiorum exemplo supra nubes, supra fulmina, supra invidiam, non supra amorem! Sic rem divinam in oculis habete, ut semper vos orbis suspiciat!