Fur: Nonne hoc futurum praecinui augur Delphicus?
Nisi Christianos verbera frangant, mollia
Neque verba frangunt. Glo: Experiri omnes modos
Prudentis est. Fur: Quid tu, Cupido, expertus es?
Cup: Flammas amoris excitavi in Caesare.
Fur: Cur non Catharinae saeviasti in pectora?
In Caesare impuro facile est victoria.
Cup: Votum illa Christo virginitatis edidit,
Hinc aditus interclusus. Et enim nil mihi
Vel perparum iuris, ubi vota castitas.
Nimium hos tuetur Christus. Fur: Ite ad Tartara!
Ego solus hanc domabo hodie virgunculam,
Aut abdicabo me „Furoris“ nomine.
Ite, ite, fausta nuntiate Belzebub!
Ang: Iam congregati sunt, Catharina, rhetores,
Iam iam meditati confluent ad proelium
Linguis agendum. Iam sibi victoriam
Spe pollicentur. Sed metus absit, nam tibi
Praeter sapientiam studio partam deus
Sapientiam dabit auctiorem caelitus.
Vinces philosophos, et corona gloriae
Accrescet ex conversione plurium. 1136 fatear] fateor C.