Cursu planitiem, saltu iuga, flumina nando
Traiicere adsuetos, mala cuncta et ferre paratos,
Et potius certae pugnando occumbere morti,
Quam violare sui Regis mandata timenda. 80
Vestrum erat hoc studium, dulcissima vestra voluptas,
Flectere equos rapidos, cornu torquere sagittas,
Vestrae hinc deliciae tergo demissa pharetra,
Missilis hasta manu, lateri suspensus, et ensis,
Martius ac sonipes; dulcis cerealia dona 85
Esca viae, potus tenuis de fontibus unda.
Quadrupedi atque viro nocturno accommoda somno
Frondibus e quernis contexta mapalia grata.
Ut dux, sic miles terris, atque aequore habebat
Horrida pro lectis, et mensis terga ferarum. 90
Quin hieme in mediâ, violento aquilone furente,
Danubii gelidas vobis prope fluminis undas
Pulvinar saxum, nix obtulit alta cubile.
Simplex, atque levis decorabat corpora amictus,
Loricâ haud tecti pugnastis pectore nudo, 95
Aurum spernentes, titulos, et laudis honores,
Ni quos vi, gladio peperisset bellica virtus.
Ingens quippe malum bello cessare putastis,
Atque mori satius, vitam quam degere inertem;
Pensa ratique colo trahit atris foemina tectis, 100
Hostem dum aggreditur pugnâ vir fortis apertâ.
Laus erat in bello pro vestro occumbere rege,
Haud mors nos terret, clamantes, tempora vitae
Sint brevia, imperium magis auctum ut sentiat orbis.
Oh! quam vestra reor felicia saecla fuere! 105
Milite tam valido labor haud devincere gentes.
Heu ! nunc inverso procedunt ordine cuncta,
Nulla fides ducibus, miles male fidus habetur,

Vade retro

Vade porro