Aestas transierat, secum et bona gaudia portans
Autumnus rubeis aderat circumdatas uvis,
Quum lux effulsit famâ celebranda perenni, 15
Quâ Vladislavo risit victoria laeta,
Innumeras acies eoi namque gigantis
Ille Tyram propter victas annum ante fugarat.
Varsoviam ad Regem proceres, clarique dynastae
Luce hac conveniunt, templis altaria fumant, 20
Solvit quisque Deo grates, pia vota, precesque,
Mente animi versans, quanam ratione, modoque
Digno fausta dies peragatur laudis honore.
Surgit mane novo Princeps, stipante cohorte,
Venandique petit stadio loca dissita ab urbe, 25
Odrysii belli simulacrum nempe daturus.
Purpureum vellus nitidâ sub veste rubebat,
Auro intertextum, gemmisque micantibus aptum.
Fulmineum lateri Princeps accingitur ensem,
Fronte gerit galeam signis, cristisque decoram, 30
Acrem flectit equum, qui anteibat cursibus auras.
Haud secus adparet, primo quum fulget eoo
Auricomus Titan, medium conscendit et axem.
Illius frater Casimirus, prima iuventa,
Cui signat teneras dubiâ lanugine malas, 35
Alipedem sublimis agens, fratremque sequutas
Vestibus ornatis, rutilisque effulget in armis.
Sit puer ille licet, virtutis lumine claret.
Iunior et Stephanus, fratri qui proximus adstat,
Antiquum flagrat gestis extendere nomen; 40
Dum nivei aeripedis spumantia lora coercet.
Hinc reliqui fratres germanos pone sequantur,
Auro conspicui, septi ac fulgentibus armis.
Et sic primaevi resplendent lumine fratris,

Vade retro

Vade porro