Rastic, DzonoAppendini, Franjo MarijaZamanja, MarijaZamanja, BernardFeric, DuroAppendini, Urban (1755-1814; 1768-1837) [1816]: Carmina, versio electronica, Versus 6583, verborum 46647, ed. Neven Jovanovic [genus: poesis - satura; poesis - elegia; poesis - epistula; poesis - carmen] [numerus verborum] [rastic-dz-c.xml].
Si vis in lexico quaerere, verbum elige et clavem 'd' in claviatura preme.
-- 138 --
SATYRA XXI. POETAE
Orem ridiculam, Maecenas, atque jocosam,
Quae nuper mihi contigit, et quam ego protinus ad te
Scribere maturo festivi more poetae.
Discinctus nostros erro dum mane per hortos,
Et versus facio, et mecum loquor, omnibus ut mos
Vatibus est, atque interdum scalpens caput, ungues
Vivos interdum rodens huc cursito, et illuc,
Quo me cumque tulere pedes, molli modo in herba
Fusus humi jaceo tacitus, similisque quieto,
Taliaque alternis repetens; quo nescio casu
Villicus observans vidit, cunctisque maligne
Narravit. Narravit? Quin etiam, Jove teste,
Addidit illud, herum misere insanire, teneri
Jam non posse, salutis spem nullam esse. Quid ultra
Exspectas? Credunt omnes. Ea fama vagatur
Ocyus, et toti factus sum fabula pago.
Fortiter, ut decuit, primum risi, atque libenter.
Mox me ubi collegi, et discusso ubi seria risu
Pervidisse datum est, paene exanimis jacui, atque
Confectus moerore gravi, dum cogito, iniqua
Quem fructum miseris servarit Musa poetis,
Ludibrium populo ut sint, insani et videantur.
Res fletu nostro, et tragico dignissima questu.
Rastic, DzonoAppendini, Franjo MarijaZamanja, MarijaZamanja, BernardFeric, DuroAppendini, Urban (1755-1814; 1768-1837) [1816]: Carmina, versio electronica, Versus 6583, verborum 46647, ed. Neven Jovanovic [genus: poesis - satura; poesis - elegia; poesis - epistula; poesis - carmen] [numerus verborum] [rastic-dz-c.xml].
|
