Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-43 --
Argivos naves tot rerum dura ferentes.
Ipsi ego quin fuerim, si me nunc audiat, auctor, 60
Ire, voces quacunque, animo et parere volente
Imperiis rex magne tuis, qui nubila cogis
Altitonans, nigraque tegis caligine caelum.
Sic Dea: sic hominum contra divumque creator
Subridens placido respondit Jupiter ore:
O Juno veneranda, deūm si tu mihi coetu
In magno assideas concors, nostrique vicissim
Conveniant sensus; nае, quem nunc dira cupido
Fert alio, mentem Neptunus vertat, utrique
Et nostrūm adjungat sese facilisque volensque. 70
Verum age, quae dixti, vera si mente locuta es,
Ocyus i superūm ad sedes, celeresque jubeto
Huc veniant Irisque, arcuque insignis Apollo:
Iris ad Argivas ferat ut se nuncia puppes,
Neptunum et regem tristique excedere pugna
Actutum, atque suas jubeat se condere in aedes;
Phoebus at ad pugnam rursum excitet Hectora, vimque
Inspiret praesens validam, saevosque dolores,
Pressa domant qui corda viro, depellat; Achivos
Terreat ut rediens, enervi et vertere cogat 80
Terga fugae, donec trepidum formidine vulgus
Ipsas Pelidae in puppes incurrat Achillei.
Ille suum exhortans in praelia dura ciebit
Patroclum; hunc urbis non longe a moenibus Hector
Congressus leto sternet, tumidumque virorum
Multa caede, meo clarum et Sarpedone vita
Exuto. iratus Patroclum propter Achilles
Hectora tum nigras Orci demittet ad umbras.
Ex illo Argivis a puppibus usque repulsos
Troas terga fugae cogam dare versa, Minervae 90
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
