Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-514 --
Nunc dat multa tibi, nunc spondet plura; virosque
Huc misit supplex, tota quos legit Achivūm
De gente, et bello eximios, et foedere tecum
Dulcis amicitiae junctos magis omnibus. horum
Noli verba, pedes noli contemnere. justa
Ultra ne veniae se fines proferat ira. 640
Sic priscos perhibent heroas, prima virorum,
Si quando subito laesi exarsere furore,
Placari solitos verbis, nec spernere dona.
Hoc olim factum memini; remque ordine totam,
Ut fuit, expediam dulces heic inter amicos.
Pugnam Curetes, Aetolūm et Martia pubes
Contulerant pulchram propter Calydona. tueri
Certabant muros Aetoli, evertere contra
Curetes diro succensi corda furore.
Hunc Trivia Aetolis objecit saeva laborem, 650
Quod frumenta olli post condita muneris Oeneus
Nil dederat, dum festa agitat Cerealia in arvis.
Quisque deum tulerat solitos epulatus honores;
Nata Jovis sacra caruit dape sola, relictam
Vel quod praeteriit gnarus, vel mente quod olli
Excidit oblita. magnas exarsit in iras
Diva potens arcu, germen Jovis; atque, furore
Acta gravi, Oeneos immanem saeva per agros
Misit aprum; qui vasta dabat late omnia, dente
Fulmineo sternens radicibus eruta ab imis 660
Obvia quaeque. solo passim squallente jacebat
Multa suis dejecta ingens cum floribus arbos.
Hunc tandem Oenides leto stravit Meleager,
Urbibus arcessens e multis robora pubis
Venatu adsuetae nemorum, celeremque canum vim.
Tantus enim paucis nulla virtute domari
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
