Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- v-295 --
Sponte mea cesso jaculans demittere morti
Corpora multa virūm. prompsi octo tela pharetra;
Belligeri totidem juvenes cecidere volucri
Confossi ferro, rabidum at contigere telo 350
Huncce canem nequeo. dixit, rursumque sonante
Impulit ab nervo magno stridore sagittam
Hectora in adversum: frustra; nam flexa, per auras
Dum volat, eximio trans altum Gorgythioni
Pectus iit, Priamo quem candida Castianira
Edidit, Aesyma Trojam deducta, deabus
Assimilis. flexa moriens caput acclinavit
Supra humerum cervice, gravi sub casside pulchrum
Quale solet, foetuque olim, vernoque gravatum
Imbre, caput flexisse horto in fragrante papaver. 360
Rursus mente furens avida petit Hectora; rursus
Missa alio sedenim (venientem avertit Apollo)
Flexit iter, dirum stridens, letalis arundo.
Ergo Archeptolemum, juxta delata papillam,
Hectoreum aurigam, figit, celsoque cruentum
Dejicit e curru. pavidi extimuere fragorem
Horrendum alipedes: vita olli, visque soluta est
Una omnis. rapto auriga ingemuit bonus Hector,
Et gravis incubuit menti dolor: attamen illinc
Abscessit stratum linquens non sponte sodalem. 370
Tum fratrem, nam juxta aderat, conscendere currus
Cerbionem, et manibus moliri jussit habenas.
Frater jussa facit: curru furibundus ab aureo
Desiluit, saxumque heros immane revulsum
Tollit humo, vastoque ferens clamore ruebat
In Teucrum. rursus diram tum forte sagittam
Prompserat e pharetra Teucer, nervoque sonanti
Aptarat, dextraque trahens admoverat ipsi
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
