Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- Homer-v-193 --
Laturum actutum. vos, dum fulgentibus armis
Cingor ego, auxilium summo ab Jove poscite votis 220
Clam tacitis, audire queat ne Troica fusas
Turba preces; vel voce palam, si tollere vocem
Forte placet, metuo nec quenquam. robore nemo,
Armorumve usu melior me pellat. egentem
Non ita me, spero, virtutis, non ita belli
Progenuitque aluitque rudem Salaminia tellus.
Haec ait ille: Jovem certatim in vota vocabant
Grajugenae; atque aliquis superas haec fudit ad auras:
Jupiter, Idaeo late de vertice rerum
Cuncta tuensque, regensque, Ajax da victor opimam 230
Ut referat laudem; sin Hectora diligis aeque,
Da vires, aequam da partem laudis utrique.
Haec illi ad caelum jactabant. aere corusco
Interea sese armabat Telamonius heros.
Omnia qui magnis postquam artubus induit arma,
Processit, qualis gradiens Mars bella virorum
Saeva petit, quorum vesanae Jupiter altus
Rixae dementi succendit corda furore.
Talis sese infert campo Ajax, murus Achivūm,
Terribili ridens vultu; gressuque superbo 240
Arduus ingreditur, dextraque immane coruscat
Telum audax. omnes quo viso gaudia Graji
Laeta sinu cepere: alto concussa pavore
Trojugenis at membra tremunt. expalluit ipse
Hector, corda micans tremefacto in pectore: pugnam
Defugere at cupidum prohibet pudor, inque suorum
Abdere sese agmen; primus qui scilicet hosti
Obtulerat sese, cuivis certare paratus.
Jamque adeo teli ad jactum pervenerat Ajax:
Scutum ingens, vastae ceu propugnacula turris 250
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
