Abnuit, atque preces irata respuit aure.
Interea, Iliades natam placare Tonantis 380
Dum certant, Hector fraternas venit ad aedes.
Has Paris eximias olim sibi fecerat, omni
E numero primos adhibens, quos dives habebat
Troja operum artifices. olli regalia tecta,
Et thalamum, et celsis circum atria fulta columnis
Exstruxere arce in summa, Priameïa juxta,
Hectoris et magni juxta penetralia. in aedes
Intulit has celeri se gressu turbidus Hector.
Hasta manu in magna cubitos protenta tremebat
In denos; praefixa micabat ahenea cuspis, 390
Ambibat fulvo quam subter circulus auro.
Heic fratrem est nactus, studio dum tractat inani
Arma sedens, clypeum, galeam, thoraca nitentem,
Curvatosque arcus. quem juxta Argiva sedebat
Nupta inter famulas, operique instabat, in omnes
Imperium exercens, prae cunctis docta, puellas.
Hunc simul ac vidit, sic Martius increpat Hector.
Pro pudor! irasci num te, secedere ab armis
Num decuit? Troës pugnant, pereuntque sub altis
Moenibus. haec propter te solum incendia belli 400
Exarsere; tamen cessas? qui praelia si quem
Detrectare alium, segnem et cessare videres,
Haud posses tacitus perferre, ac parcere probris.
Verum, agedum, consurge istinc festinus, et omnes
Rumpe moras; Grajus ne Mavors proruat urbem,
Dardania et tristi jam flagrent moenia flamma.
Haec ille: haec contra formosus mitia reddit
Verba Paris: Frater, vera istaec dicis; at audi
Me tamen, atque aures, mentemque adverte. sedebam
Heic procul a pugna in thalamo, non civibus ullam 410

Vade retro

Vade porro