Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
Si vis in lexico quaerere, verbum elige et clavem 'd' in claviatura preme.
-- Homer-v-774 --
Submisit: laeto riserunt gramine campi.
Illae autem pavidis ambae incessere columbis
Assimiles; unaque leves Argiva petebant
Agmina laturae auxilium. dehinc tramite recto
Ut venere illuc, dium circa Diomedem
Stant ubi magnanimi comites, Mavortia pubes,
Viribus, atque animo similis praestante leonum,
Aprorum aut turmae per tela adversa ruentum. 930
Restitit, atque altum clamavit regia Juno,
Stentoris arguti simulans dea candida vocem
Indomitam; qui jussa ferens regalia praeco,
Quinquaginta viris par magna voce sonabat:
Non pudet, Argivi segnes, timidique, nec ulla
Re, praeter speciem, miri hostibus? inter Achilles
Praelia dum fortis versari dura solebat,
Dardanias extra portas procedere Troes
Nunquam ausi; pavido tremefacti corde timebant
Illius at patriis inclusi moenibus hastam. 940
Nunc īdem ad curvas pugnant procul urbe carinas.
Sic ait, ac verbis virtutem incendit amaris.
Tydiden magno festinans at cita gressu
Pallas adit. curru acclinis tum forte quierat
Bellator, vulnus relevans frigentibus auris,
Olli quod Lycius fatali Pandarus arcu
Intulerat. magno clypei nam pondere pressus
Ingentis, loro subter sudore fluebat,
Languebatque manum fessus. lorum ergo remorat
Attollens, nigrumque cruorem terserat heros. 950
Cum propior curru dea constitit, ac juga dextra
Curva tenens, regem his affata est vocibus ultro:
Haud similem Tydeus genuit sibi robore prolem,
Atque animis; Tydeus, parvo qui corpore, at armis
Kunic, Rajmund (1719-1794) [1776]: Homeri Ilias, Latinis versibus expressa, versio electronica, 18.330 versus, verborum 126.883, ed. Petra Sostaric [genus: poesis - epica; poesis - versio] [numerus verborum] [kunic-r-ilias-libri.xml].
|
